नेक्सजेन म्यानेजमेन्टको आईपीओ यात्राः ‘केयर–एनपी डबल बी’ रेटिङ प्राप्त

१६ माघ, काठमाडौं । लगानी व्यवस्थापनको क्षेत्रमा क्रियाशील नेक्सजेन म्यानेजमेन्ट एण्ड इक्विटी सोलुसन्स लिमिटेडले सर्वसाधारणका लागि शेयर निष्कासन गर्ने प्रक्रियामा एक महत्त्वपूर्ण फड्को मारेको छ ।

केयर रेटिङ नेपाल लिमिटेडले हालै गरेको मूल्याङ्कनअनुसार कम्पनीलाई ‘केयर–एनपी डबल बी’ रेटिङ प्रदान गरेको छ, जसले कम्पनीको वित्तीय दायित्व वहन गर्ने क्षमता राम्रो रहेको पुष्टि गर्दछ । २०७४ सालमा स्थापना भई विगत ६ वर्षदेखि निरन्तर नाफा कमाउन सफल यस कम्पनीले आफ्नो वित्तीय अवस्थालाई मजबुत बनाउँदै सार्वजनिक शेयर निष्कासनका लागि आवश्यक प्राविधिक आधार तयार पारेको हो।

कम्पनीले आफ्नो पूँजी संरचनालाई विस्तार गर्ने उद्देश्यका साथ गत पुस मसान्तसम्म संस्थापकहरूबाट ५० करोड रुपैयाँ पूँजी जुटाइसकेको छ । माघ ५ गते सम्पन्न विशेष साधारण सभाको निर्णयबमोजिम कम्पनीले आफ्नो जारी पूँजीको २० प्रतिशत शेयर सर्वसाधारणमा ल्याउने तयारी गरेको छ । यो निष्कासनपछि कम्पनीको चुक्ता पूँजी ६२ करोड ५० लाख रुपैयाँ पुग्ने प्रक्षेपण गरिएको छ । पछिल्ला वर्षहरूमा नियमित लाभांश वितरण गर्दै आएको र नेटवर्थ समेत अंकित मूल्यभन्दा माथि रहेकाले लगानीकर्ताहरू माझ नेक्सजेनप्रति आकर्षण बढ्दो देखिएको छ ।

शेयर निष्कासन प्रक्रियालाई व्यवस्थित बनाउन कम्पनीले माघ ८ गते नै लक्ष्मी सनराइज क्यापिटल मार्केटसँग बिक्री प्रबन्धकका रूपमा सम्झौता गरिसकेको छ । रेटिङ प्राप्तिसँगै अब नेपाल धितोपत्र बोर्डबाट अनुमति लिने प्रक्रिया अगाडि बढ्नेछ । लगानी व्यवस्थापन र वित्तीय परामर्शमा स्थापित हुँदै गएको यस संस्थाले सार्वजनिक शेयर जारी गरेपछि आफ्नो कार्यक्षेत्रलाई थप व्यापक बनाउने लक्ष्य लिएको छ । मध्यम स्तरको वित्तीय जोखिम देखिए तापनि संस्थाको विगतको नाफा र व्यवस्थित सञ्चालनले प्राथमिक बजारमा नयाँ उत्साह थप्ने विश्वास गरिएको छ।

Source: https://racekhabar.com/2026/01/30/87672/

प्रकाशित मितिः २०८२ माघ १६